ಸ್ಟೆಮ್ ಲ್ಯಾಬ್ ಹೊಂದಿದ ಮೊದಲ ಸರ್ಕಾರಿ ಶಾಲೆ !

ಉತ್ತರಕನ್ನಡ ಜಿಲ್ಲೆಯ ಶಿರಸಿಯ ಮಾರಿಕಾಂಬಾ ಪ್ರೌಢಶಾಲೆಯಲ್ಲಿ ಸ್ಟೆಮ್ ಲ್ಯಾಬ್ ಅಳವಡಿಸಲಾಗಿದೆ. ಇದೇ ಮೊದಲ ಬಾರಿ ಸರ್ಕಾರಿ ಶಾಲೆಯಲ್ಲಿ ಅಳವಡಿಸಿದ್ದು. ಸ್ಟೆಮ್ ಲ್ಯಾಬ್ ಎಂದರೆ ಸೈನ್ಸ್, ಟೆಕ್ನಾಲಜಿ, ಇಂಜಿನಿಯರಿಂಗ್, ಮ್ಯಾತ್ಸ್ ಲ್ಯಾಬ್ ಎಂದರ್ಥ. ಈಗಾಗಲೇ ಮಧ್ಯಪ್ರದೇಶ, ಗೋವಾದಲ್ಲಿ ಎರಡು ವರ್ಷದ ಹಿಂದೆಯೇ ಜಾರಿಯಾಗಿರುವ ಈ ಲ್ಯಾಬ್ ಕರ್ನಾಟಕದ ಖಾಸಗಿ ಶಾಲೆಗಳಲ್ಲಿರಬಹುದು. ಆದರೆ ಸರ್ಕಾರಿ ಶಾಲೆಗಳಲ್ಲಿ ಇದೇ ಮೊದಲ ಬಾರಿಗೆ ಸ್ಟೆಮ್ ಲ್ಯಾಬ್‌ನ್ನು ಅಳವಡಿಸಲಾಗಿದೆ. ಇದನ್ನು ಸ್ಕೋಡ್‌ ವೇಸ್‌ ಹಾಗೂ ದೇಸಾಯಿ ಫೌಂಡೇಶನ್ ಅವರು ಮಾರಿಕಾಂಬಾ ಪ್ರೌಢಶಾಲೆಗೆ ನೀಡಿದ್ದಾರೆ. ಪ್ರಸ್ತುತ 1500 ವಿದ್ಯಾರ್ಥಿಗಳಿರುವ ಈ ಶಾಲೆಯಲ್ಲಿ ಮಕ್ಕಳಿಗೆ 8, 9, 10 ನೇ ತರಗತಿಯಲ್ಲಿಯೇ ರೋಬೋಟಿಕ್ಸ್ ಹೇಳಿಕೊಡಲಾಗುತ್ತಿದೆ. ಸ್ಟೆಮ್ ಲ್ಯಾಬ್‌ನಲ್ಲಿ ರೋಬೋಟಿಕ್ಸ್ ಅನ್ನು ಮಕ್ಕಳಿಗೆ ಬೋಧಿಸಲಾಗಿದ್ದು, ಮಕ್ಕಳು ಇಂಜಿನಿಯರಿಂಗ್ ಹಾಗೂ ಟೆಕ್ನಾಲಜಿಯ ಬಗ್ಗೆ 8 ನೇ ತರಗತಿಯಲ್ಲಿಯೇ ಕಲಿಯುತ್ತಿದ್ದಾರೆ. ಇದರಿಂದ ಅವರಿಗೆ ಹೊಸ ಅನುಭವ ದಕ್ಕುತ್ತಿದೆ. ಹೀಗೆ ರೋಬೋಟಿಕ್ಸ್, ಇಂಜಿನಿಯರಿಂಗ್ ಹಾಗೂ ಎ ಐ(AI) ನಂತರ ವಿಷಯಗಳನ್ನು ಈ ಶಾಲೆಯಲ್ಲಿ ಅಳವಡಿಸಿಕೊಳ್ಳಲಾಗುತ್ತಿದೆ. ಆ ಮೂಲಕ ಸರ್ಕಾರಿ ಶಾಲೆ ಯಾವುದಕ್ಕೂ ಕಮ್ಮಿಯಿಲ್ಲ ಎಂಬುದಕ್ಕೆ ಮಾರಿಕಾಂಬಾ ಪ್ರೌಢಶಾಲೆ ಸಾಕ್ಷಿಯಾಗಿದೆ.