18 ವರ್ಷದೊಳಗಿನ ಮಕ್ಕಳ ಸಾಮಾಜಿಕ ಜಾಲತಾಣಗಳ ಖಾತೆಗೆ ಪೋಷಕರ ಸಮ್ಮತಿ ಕಡ್ಡಾಯ

ಹೊಸದಿಲ್ಲಿ: ಸಾಮಾಜಿಕ ಮಾಧ್ಯಮಗಳಲ್ಲಿ ಮಕ್ಕಳ ಹಕ್ಕು ಹಾಗೂ ಖಾಸಗಿತನ ರಕ್ಷಿಸಲು 'ಡಿಜಿಟಲ್‌ ಪರ್ಸನಲ್‌ ಡೇಟಾ ಪ್ರೊಟೆಕ್ಷನ್‌ ಕಾಯಿದೆ' ಅನುಸಾರ ಹೊಸ ಕರಡು ನಿಯಮಗಳನ್ನು ಕೇಂದ್ರ ಸರಕಾರ ಶುಕ್ರವಾರ ಬಿಡುಗಡೆ ಮಾಡಿದೆ. ಮಕ್ಕಳ ಖಾಸಗಿತನ ರಕ್ಷಿಸಲು ಆದ್ಯತೆ ನೀಡಲಾಗಿದ್ದು, ಪೋಷಕರ ಸಮ್ಮತಿ ಇಲ್ಲದೆ 18 ವರ್ಷದ ಒಳಗಿನ ಮಕ್ಕಳು ಖಾತೆ ತೆರೆಯದಂತೆ ನಿರ್ಬಂಧಿಸಿದೆ.

ಹೊಸ ಕರಡು ನಿಯಮಗಳನ್ನು ಸಾರ್ವಜನಿಕವಾಗಿ ಪ್ರಕಟಿಸಿರುವ ಸರಕಾರ, ಫೆಬ್ರವರಿ 18ರೊಳಗೆ ಉದ್ದೇಶಿತ ನಿಮಯಗಳ ಕುರಿತು ದೂರುಗಳ ಬಗ್ಗೆ ಅಭಿಪ್ರಾಯ ಹಂಚಿಕೊಳ್ಳುವಂತೆ ಸೂಚಿಸಿದೆ.

ಕರಡು ನಿಯಮದ ಪ್ರಕಾರ ಮಕ್ಕಳ ವೈಯಕ್ತಿಕ ದತ್ತಾಂಶ ದಾಖಲಿಸುವ ಮೊದಲು ಪೋಷಕರ ಒಪ್ಪಿಗೆ ಪಡೆಯಲಾಗಿದೆಯೇ ಎಂಬುದನ್ನು ಸಾಮಾಜಿಕ ಜಾಲತಾಣ ವೇದಿಕೆಗಳು ಖಚಿತಪಡಿಸಿಕ್ಳೊಬೇಕು ಎಂಬ ಷರತ್ತು ವಿಧಿಸಲಾಗಿದೆ. ಪೋಷಕರೆಂದು ಗುರುತಿಸಲಾದ ವ್ಯಕ್ತಿ ವಯಸ್ಕರೇ ಅಲ್ಲವೇ ಎಂಬುದನ್ನು ಪರಿಶೀಲಿಸಲು ಸೂಕ್ತ ವ್ಯವಸ್ಥೆ ರೂಪಿಸಿಕೊಳ್ಳಲು ಸೂಚಿಸಲಾಗಿದೆ.

ಮಕ್ಕಳ ದತ್ತಾಂಶ ಸಂಸ್ಕರಣೆಗೆ ಸಂಬಂಧಿಸಿದಂತೆ ಜಾರಿಗೆ ತರಲು ಹೊರಟಿರುವ ನಿಬಂಧನೆಗಳು 2023ರಿಂದಲೂ ವಿವಾದಾತ್ಮಕ ವಿಷಯವಾಗಿದೆ. ಮೆಟಾ, ಗೂಗಲ್ ಮುಂತಾದ ಬೃಹತ್‌ ಟೆಕ್‌ ಕಂಪನಿಗಳು ಕಾಯಿದೆಯಲ್ಲಿನ ಮಕ್ಕಳ ವ್ಯಾಖ್ಯಾನವನ್ನು ಬದಲಾಯಿಸಬೇಕು ಎಂದು ಬಯಸುತ್ತಿವೆ.

ಮಕ್ಕಳ ವಯಸ್ಸನ್ನು 18 ವರ್ಷದ ಬದಲು 14 ವರ್ಷಕ್ಕೆ ಸೀಮಿತಗೊಳಿಸುವಂತೆ ಇವು ಬೇಡಿಕೆ ಇಟ್ಟಿವೆ. ಮಕ್ಕಳ ದತ್ತಾಂಶವನ್ನು ಸಂಸ್ಕರಿಸಲು ಇಂತಹ ನಿರ್ಬಂಧಗಳನ್ನು ಹೇರುವುದರಿಂದ ನಾವೀನ್ಯತೆಯನ್ನೇ ಮೊಟಕುಗೊಳಿಸಬಹುದು ಎಂದು ಈ ಕಂಪನಿಗಳು ಈ ಹಿಂದೆ ವಾದಿಸಿದ್ದವು.