ಯುದ್ದಭೂಮಿಯಿಂದ ಆಟದ ಮೈದಾನದವರೆಗೆ - ಪಾಕಿಸ್ತಾನಕ್ಕೆ ಸೋಲಿನ ಮೇಲೆ ಸೋಲು, ಅವಮಾನ

ಇತ್ತೀಚಿನ ಕೆಲವು ದಿನಗಳಲ್ಲಿ ತನ್ನ ಶತ್ರು ರಾಷ್ಟ್ರ ಭಾರತದ ಎದುರು ಈ ಮಟ್ಟಿನ ಸೋಲು, ಅವಮಾನವನ್ನು ಪಾಕಿಸ್ತಾನ ನಿರೀಕ್ಷಿಸಿರಲಿಕ್ಕಿಲ್ಲ. ಅದು, ಯುದ್ದಭೂಮಿಯೇ ಆಗಿರಲಿ, ಆಟದ ಮೈದಾನವೇ ಆಗಿರಲಿ, ಸತತವಾಗಿ ಪಾಕಿಸ್ತಾನಕ್ಕೆ ಹಿನ್ನಡೆಯಾಗುತ್ತಿದೆ. ಸೇಡು ತೀರಿಸಿಕೊಳ್ಳಲು ಯಾವುದೇ ಅವಕಾಶವನ್ನು ಭಾರತ ಬಿಟ್ಟು ಕೊಡುತ್ತಿಲ್ಲ.

ಮೊದಲಿನಿಂದಲೂ ಭಾರತ ಮತ್ತು ಪಾಕಿಸ್ತಾನದ ನಡುವೆ ಸಂಬಂಧ ಕದಡಿತ್ತು. ಇದಕ್ಕೆ ತುಪ್ಪ ಸುರಿಯುವಂತೆ, ಏಪ್ರಿಲ್ 22, 2025ರಂದು ಪ್ರಶಾಂತ ಮತ್ತು ಸುಂದರ ಕಾಶ್ಮೀರದ ಪಹಲ್ಗಾಮ್ ನಲ್ಲಿ ಪಾಕ್ ಕೃಪಾಪೋಷಿತ ಉಗ್ರರು ನಡೆಸಿದ ದಾಳಿಯಲ್ಲಿ 26 ಅಮಾಯಕ ಪ್ರವಾಸಿಗರು ಸಾವನ್ನಪ್ಪಿದ್ದರು. ವಿದೇಶ ಪ್ರವಾಸದಲ್ಲಿದ್ದ ಪ್ರಧಾನಿ ನರೇಂದ್ರ ಮೋದಿ, ಅಲ್ಲಿಂದಲೇ ಪ್ರತೀಕಾರ ತೀರಿಸಿಕೊಳ್ಳುವುದಾಗಿ ಹೇಳಿದ್ದರು.

ಅದರಂತೆಯೇ, ಭಾರತದ ಮಿಲಿಟರಿ ಆಪರೇಷನ್ ಸಿಂಧೂರ್ ಕಾರ್ಯಾಚರಣೆಯನ್ನು ಆರಂಭಿಸಿತ್ತು. ಜೊತೆಗೆ, ಸಿಂಧೂ ನದಿನೀರು ಒಪ್ಪಂದವನ್ನು ತಡೆ ಹಿಡಿದಿತ್ತು. ನೀರು ತಡೆ ಹಿಡಿಯುವುದು ಸರಿಯಲ್ಲ ಎನ್ನುವ ಅಂತರರಾಷ್ಟ್ರೀಯ ಒತ್ತಡಕ್ಕೆ ಭಾರತ ಸರ್ಕಾರ ಕ್ಯಾರೇ ಮಾಡಲಿಲ್ಲ. ಮೇ ಏಳರ ತಡರಾತ್ರಿ ಭಾರತದ ವಾಯುಪಡೆ ನಡೆಸಿದ ಕರಾರುವಾಕ್ ದಾಳಿಯಲ್ಲಿ ಸುಮಾರು 120ಕ್ಕೂ ಉಗ್ರರು ಬಲಿಯಾಗಿದ್ದರು. ಪಾಕಿಸ್ತಾನದ ನೆಲಕ್ಕೆ ನುಗ್ಗಿ, ಭಾರತದ ವಾಯುಪಡೆ ದಾಳಿಯನ್ನು ನಡೆಸಿತ್ತು.

ಇದರ ಬೆನ್ನಲ್ಲೇ, ಪಾಕಿಸ್ತಾನ ಪ್ರತಿರೋಧ ತೋರಲು ಆರಂಭಿಸಿದ ನಂತರ, ಪಾಕಿಸ್ತಾನದ ಪ್ರಮುಖ ವಾಯುನೆಲೆ ರಾವಲ್ಪಿಂಡಿ ಏರ್ಬೇಸ್ ಮೇಲೆ ದಾಳಿಯನ್ನು ನಡೆಸಿತ್ತು. ಪಾಕಿಸ್ತಾನದ ಸೇನಾ ಮುಖ್ಯಸ್ಥ ಆಸಿಮ್ ಮುನೀರ್, ಬಂಕರ್ ನಲ್ಲಿ ಅವಿತುಕೊಳ್ಳುವ ಪರಿಸ್ಥಿತಿ ನಿರ್ಮಾಣವಾಗಿತ್ತು. ಭಾರತ ದಾಳಿ ನಡೆಸಿರುವುದನ್ನು ಪಾಕಿಸ್ತಾನದ ಪ್ರಧಾನಿ ಷರೀಫ್, ಅಂತರರಾಷ್ಟ್ರೀಯ ವೇದಿಕೆಯಲ್ಲಿ ಖಚಿತ ಪಡಿಸಿದ್ದರು. ಇದಾದ ನಂತರ, ಎರಡು ದೇಶಗಳ ಡಿಜಿಎಂಒ (Direct General of military operation) ಮಾತುಕತೆಯ ನಂತರ ಕದನ ವಿರಾಮ ಘೋಷಿಸಲ್ಪಟ್ಟಿತ್ತು. ಸೋತು ಸುಣ್ಣವಾಗಿದ್ದ ಪಾಕಿಸ್ತಾನ, ಯುದ್ದದಲ್ಲಿ ನಾವೇ ಗೆದ್ದಿದ್ದು ಎಂದು ತಮ್ಮ ಜನರನ್ನು ಯಾಮಾರಿಸಲು ಆರಂಭಿಸಿತು.

ವಿಶ್ವಸಂಸ್ಥೆಯ ಸಾಮಾನ್ಯ ಶೃಂಗ ಸಭೆಯಲ್ಲಿ ಪಾಕಿಸ್ತಾನದ ಡಬಲ್ ಸ್ಟ್ಯಾಂಡರ್ಡ್ ಅನ್ನು ವಿಶ್ವಕ್ಕೆ ಭಾರತ ಪರಿಚಯಿಸಿತು. ತನ್ನ ನೆಲದಲ್ಲಿ ಯಾವ ರೀತಿ ಉಗ್ರರನ್ನು ಪೋಷಿಸುತ್ತಿದೆ ಎನ್ನುವುದನ್ನು ಭಾರತದ ವಿದೇಶಾಂಗ ಇಲಾಖೆಯ ಸಚಿವಾಲಯ ದಾಖಲೆ ಸಮೇತ ಸಭೆಯಲ್ಲಿ ಮುಂದಿಟ್ಟಿತ್ತು. ಆಪರೇಷನ್ ಸಿಂಧೂರ್ ವೇಳೆ, ನಾಗರಿಕರ ಮೇಲೆ ಯಾವುದೇ ದಾಳಿಯನ್ನು ನಡೆಸದೇ, ಟಾರ್ಗೆಟ್ ನೇರವಾಗಿ ಉಗ್ರರು ಎನ್ನುವುದನ್ನು ಸ್ಪಷ್ಟ ಪಡಿಸಿತು. ಆ ಮೂಲಕ, ಪಾಕಿಸ್ತಾನಕ್ಕೆ ಅಲ್ಲೂ ಮುಖಭಂಗವಾಯಿತು.

ಆಟದ ಮೈದಾನದಲ್ಲೂ ಪಾಕಿಸ್ತಾನಕ್ಕೆ ಭಾರತ ಮಣ್ಣು ಮುಕ್ಕಿಸಿತು. ಉಗ್ರರನ್ನು ಪೋಷಿಸುತ್ತಿರುವ ರಾಷ್ಟ್ರದ ಜೊತೆಗೆ ಆಡಲೇ ಬಾರದು ಎನ್ನುವ ಒತ್ತಡದ ನಡುವೆ, ಎಂಟು ರಾಷ್ಟ್ರಗಳು ಏಷ್ಯಾ ಕಪ್ ನಲ್ಲಿ ಭಾಗವಹಿಸುತ್ತಿರುವುದರಿಂದ, ಆಡ ಬೇಕಾದ ಅನಿವಾರ್ಯತೆಗೆ ಬಿತ್ತು. ಮೊದಲ ಪಂದ್ಯದಲ್ಲೇ ಹ್ಯಾಂಡ್ ಶೇಕ್ ಮಾಡಲು ನಿರಾಕರಿಸುವ ಮೂಲಕ, ಪಾಕಿಸ್ತಾನವನ್ನು ಎಲ್ಲಿ ಇಡಬೇಕೋ ಅಲ್ಲಿ ಇಟ್ಟಿತು. ಏಷ್ಯಾ ಕಪ್ ನಲ್ಲಿ, ಪಾಕಿಸ್ತಾನದ ವಿರುದ್ದ ಆಡಲಾದ ಮೂರೂ ಪಂದ್ಯದಲ್ಲಿ ಭರ್ಜರಿ ಜಯವನ್ನು ಸಾಧಿಸಿತು. ಇದರಿಂದ, ಪಾಕಿಸ್ತಾನ ಅವಮಾನ ಎದುರಿಸುವಂತಾಯಿತು.

ಇನ್ನು, ಕೊಲೊಂಬೊದಲ್ಲಿ ನಡೆಯುತ್ತಿರುವ ಮಹಿಳಾ ವಿಶ್ವಕಪ್ ಏಕದಿನ ಕ್ರೀಡಾಕೂಟದಲ್ಲೂ ಪಾಕಿಸ್ತಾನಕ್ಕೆ ಅವಮಾನದ ಅಭಿಯಾನ ಮುಂದುವರಿದಿದೆ. ಅಲ್ಲೂ, ಭಾರತ ತಂಡದ ನಾಯಕಿ ಹರ್ಮಾನ್ ಪ್ರೀತ್ ಕೌರ್, ಪಾಕಿಸ್ತಾನದ ತಂಡದ ನಾಯಕಿ ಫಾತೀಮಾ ಸನಾ ಹ್ಯಾಂಡ್ ಶೇಕ್ ಮಾಡಲಿಲ್ಲ. ಇನ್ನು, ಆಟದಲ್ಲಿ ಭಾರತ ತನ್ನ ಆಲ್ರೌಂಡರ್ ಪ್ರದರ್ಶನವನ್ನು ಮುಂದುವರಿಸಿತು. ಪಾಕಿಸ್ತಾನ ಮಹಿಳೆಯರ ತಂಡ 88 ರನ್ನುಗಳಿಂದ ಭಾರತಕ್ಕೆ ಶರಣಾಯಿತು.

ಇನ್ನು ಬರೀ ಕ್ರಿಕೆಟಿಗೆ ಮಾತ್ರ ಇದು ಮೀಸಲಾಗಿರಲಿಲ್ಲ. ಫುಟ್ಬಾಲ್ ಪಂದ್ಯಾವಳಿಯಲ್ಲೂ ಭಾರತದ ಯುವಕರು ಭರ್ಜರಿ ಪ್ರದರ್ಶನವನ್ನು ನೀಡಿದರು. ಕೊಲೊಂಬೊದಲ್ಲಿ ನಡೆದ ಎಸ್ಎಎಫ್ಎಫ್ ( South Asian Football Federation) ಅಂಡರ್ 17 ಕ್ರೀಡಾಕೂಟದಲ್ಲಿ ಪಾಕಿಸ್ತಾನದ ವಿರುದ್ದ ಭಾರತದ ಹುಡುಗರು 3 -2 ಅಂತರದಲ್ಲಿ ಗೆಲುವನ್ನು ಸಾಧಿಸಿದರು. ಎರಡನೇ ಗೋಲ್ ಅನ್ನು ಭಾರಿಸಿದ ತಕ್ಷಣ, ಕ್ರೀಡಾಂಗಣದಲ್ಲಿ ಮೂಲೆಗೆ ಬಂದು, ಕೂತು ಟೀ ಕುಡಿಯುವ ರೀತಿಯಲ್ಲಿ ಅಬ್ದುಲ್ಲಾ ಅಣಕಿಸಿದರು. ಇದಾದ ಸ್ವಲ್ಪ ಹೊತ್ತಿನಲ್ಲಿ ಭಾರತ ಮೂರನೇ ಗೋಲ್ ಹೊಡೆಯುವ ಮೂಲಕ, ಪಾಕಿಸ್ತಾನದ ಆಟಗಾರರು ಪೇಚು ಮೋರೆ ಹಾಕುವಂತಾಯಿತು.

ಭಾರತದ ಗಡಿಯಲ್ಲಿ ತಂಟೆಯನ್ನು ಮಾಡುತ್ತಿರುವ ಪಾಕಿಸ್ತಾನಕ್ಕೆ ಆಗಿಂದಾಗ್ಯೆ ಬುದ್ದಿ ಕಲಿಸಲು, ಭಾರತ ಆಪರೇಶನ್ ಮಹಾದೇವ್ ಕಾರ್ಯಾಚರಣೆ ಆರಂಭಿಸಿದೆ. ಈಗಾಗಲೇ, ಪಹಲ್ಗಾಮ್‌ ಭಯೋತ್ಪಾದಕ ದಾಳಿಯ ಮಾಸ್ಟರ್‌ ಮೈಂಡ್‌ ಸುಲೇಮಾನ್‌ ಶಾ ಮತ್ತು ಈ ದಾಳಿಯಲ್ಲಿ ಭಾಗಿಯಾಗಿದ್ದ ಮತ್ತೋರ್ವ ಉಗ್ರನನ್ನು ಸೇನೆ ಹೊಡೆದು ಉರುಳಿಸಿದೆ. ಈ ಕಾರ್ಯಚರಣೆ ಮುಂದುವರಿಯಲಿದೆ ಎಂದು ಭಾರತ, ಪಾಕಿಸ್ತಾನಕ್ಕೆ ಎಚ್ಚರಿಕೆಯನ್ನು ನೀಡಿದೆ. ಆ ಮೂಲಕ, ಎಲ್ಲಾ ವಿಧದಲ್ಲೂ ಪಾಕಿಸ್ತಾನ ಅವಮಾನವನ್ನು ಎದುರಿಸುತ್ತಿದೆ.