ಇಸ್ರೋದ SpaDeX ಕಾರ್ಯಾಚರಣೆಗೆ ದಿನಗಣನೆ

ಹೊಸದಿಲ್ಲಿ: ಭಾರತದ ಬಾಹ್ಯಾಕಾಶ ಸಾಮರ್ಥ್ಯ ಕಂಡು ಜಗತ್ತು ನಿಬ್ಬೆರಗಾಗುತ್ತಿದೆ. ಬಾಹ್ಯಾಕಾಶದಲ್ಲಿ ವಿಶ್ವದ ಪ್ರಬಲ ರಾಷ್ಟ್ರಗಳಿಗೆ ಪೈಪೋಟಿ ನೀಡುವ ಹಂತಕ್ಕೆ ಬಂದು ತಲುಪಿರುವ ಭಾರತ, ತನ್ನ ಸ್ವಸಾಮರ್ಥ್ಯದಿಂದಲೇ ಬಾಹ್ಯಾಕಾಶವನ್ನು ಗೆಲ್ಲುವ ಗುರಿಯೊಂದಿಗೆ ಮುನ್ನುಗುತ್ತಿದೆ. ಇದೇ ಕಾರಣಕ್ಕೆ ಭಾರತದ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೇ ಇಸ್ರೋದೊಂದಿಗೆ ಕೈಜೋಡಿಸಲು ವಿಶ್ವದ ಪ್ರಬಲ ಬಾಹ್ಯಾಕಾಶ ಸಂಸ್ಥೆಗಳು ನಾ ಮುಂದು. ನೀ ಮುಂದು ಎಂದು ಪೈಪೋಟಿಗಿಳಿದಿವೆ.

ಇದೀಗ ಇಸ್ರೋದ 2024ರ ಕೊನೆಯ ಕಾರ್ಯಾಚರಣೆ ಮೇಲೆ ಜಗತ್ತಿನ ಕಣ್ಣಿದ್ದು, ಸ್ಪೆಡೆಕ್ಸ್‌ (SpaDex) ಹೆಸರಿನ ಈ ಕಾರ್ಯಾಚರಣೆಗೆ ಇಸ್ರೋ ಇದೇ ಡಿ.30ರಂದು ಚಾಲನೆ ನೀಡಲಿದೆ. ಬಾಹ್ಯಾಕಾಶದಲ್ಲಿ ಸಾಮಾನು ಸರಂಜಾಮುಗಳ ಡಾಕಿಂಗ್‌ ವ್ಯವಸ್ಥೆಯನ್ನು ಬಲಪಡಿಸುವ ಉದ್ದೇಶ ಹೊಂದಿರುವ ಸ್ಪೆಡೆಕ್ಸ್‌ ಕಾರ್ಯಾಚರಣೆ ಯಶಸ್ವಿಯಾದಲ್ಲಿ, ಬಾಹ್ಯಾಕಾಶದಲ್ಲಿ ನೌಕೆ ಅಥವಾ ಉಪಗ್ರಹಗಳ ಡಾಕಿಂಗ್‌ ಕೈಗೊಳ್ಳುವ ಸಾಮರ್ಥ್ಯ ಹೊಂದಿರುವ ವಿಶ್ವದ ಪ್ರಬಲ ರಾಷ್ಟ್ರಗಳ ಪಟ್ಟಿಗೆ ಭಾರತ ಸೇರ್ಪಡೆಯಾಗಲಿದೆ.

ಇದುವರೆಗೂ ಕೇವಲ ಅಮೆರಿಕ, ರಷ್ಯಾ ಮತ್ತು ಚೀನಾ ದೇಶಗಳು ಮಾತ್ರ ಬಾಹ್ಯಾಕಾಶದಲ್ಲಿ ಯಶಸ್ವಿ ಡಾಕಿಂಗ್‌ ವ್ಯವಸ್ಥೆಯನ್ನು ಹೊಂದಿರುವ ಮೂರು ರಾಷ್ಟ್ರಗಳಾಗಿವೆ. ಭಾರತ ಶೀಘ್ರದಲ್ಲೇ ಈ ರಾಷ್ಟ್ರಗಳ ಸಾಲಿಗೆ ಸೇರಲಿದ್ದು, ಡಿ.30ರಂದು ಹೊಸ ಇತಿಹಾಸ ಬರೆಯಲು ಸಂಪೂರ್ಣ ಸಜ್ಜಾಗಿದೆ.

ಬಾಹ್ಯಾಕಾಶದಲ್ಲಿ ಡಾಕಿಂಗ್ ಮಾಡುವುದು ಅತ್ಯಂತ ಕಷ್ಟಕರವಾದ ಮತ್ತು ಸಂಕೀರ್ಣವಾದ ಕಾರ್ಯವಿಧಾನಗಳಲ್ಲಿ ಒಂದಾಗಿದೆ. ಚಿಕ್ಕ ಲೋಪದೋಷವೂ ಭಾರೀ ದುರಂತಕ್ಕೆ ಕಾರಣವಾಗಬಹುದು. ಇದೇ ಕಾರಣಕ್ಕೆ ತಂತ್ರಜ್ಞಾನದ ಸಾಮರ್ಥ್ಯ ಹೆಚ್ಚಿರುವ ರಾಷ್ಟ್ರಗಳು ಮಾತ್ರ ಬಾಹ್ಯಾಕಶದಲ್ಲಿ ಡಾಕಿಂಗ್‌ ವ್ಯವಸ್ಥೆಯನ್ನು ಹೊಂದಿವೆ.ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣ ತಲಪುವ ಗಗನಯಾತ್ರಿಗಳ ಸುರಕ್ಷಿತ ಡಾಕಿಂಗ್‌ ಜವಾಬ್ದಾರಿಯನ್ನು ಅಮೆರಿಕ ಮತ್ತು ರಷ್ಯಾ ದೇಶಗಳು ಹೊತ್ತುಕೊಂಡಿರುವುದು ಇದಕ್ಕೆ ಒಂದು ಉತ್ತಮ ಉದಾಹರಣೆ..

ಏನಿದು ಸ್ಪೆಡೆಕ್ಸ್‌ ಮಿಷನ್‌?

ಆಂಧ್ರಪ್ರದೇಶದ ಶ್ರೀಹರಿಕೋಟಾದಲ್ಲಿರುವ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ, ಡಿಸೆಂಬರ್ 30ರ ರಾತ್ರಿ 9:58 ಗಂಟೆಗೆ PSLV-C60 ರಾಕೆಟ್‌ ಮೂಲಕ ಎರಡು ಬಾಹ್ಯಾಕಾಶ ನೌಕೆಗಳು ನಭಕ್ಕೆ ಚಿಮ್ಮಲಿವೆ. ಬರೋಬ್ಬರಿ 220 ಕೆಜಿ ತೂಕವಿರುವ ಚೇಸರ್ (SDX01) ಮತ್ತು ಟಾರ್ಗೆಟ್ (SDX02) ಬಾಹ್ಯಾಕಾಶ ನೌಕೆಗಳು, ಭೂ ಮೇಲ್ಮೈಯಿಂದ ಸುಮಾರು 470 ಕಿ.ಮೀ ಎತ್ತರದಲ್ಲಿ ಭೂ ಕಕ್ಷೆಯನ್ನು ಸುತ್ತಲಿವೆ. ನಂತರ ಮುಂದಿನ 24 ಗಂಟೆಗಳ ಕಾಲ ಸುಮಾರು 20 ಕಿ.ಮೀ ಅಂತರದಲ್ಲಿ ವೃತ್ತಾಕಾರದ ಕಕ್ಷೆಯಲ್ಲಿ ಭೂಮಿಯನ್ನು ಸುತ್ತುವ ಈ ಎರಡೂ ನೌಕೆಗಳನ್ನು, ಬೆಂಗಳೂರಿನಲ್ಲಿರುವ ಇಸ್ರೋದ ಮಿಷನ್ ಕಂಟ್ರೋಲ್‌ನ ವಿಜ್ಞಾನಿಗಳು ಸಂಕೀರ್ಣವಾದ ಡಾಕಿಂಗ್‌ ಮತ್ತು ಅನ್‌ಡಾಕಿಂಗ್‌ ಕೌಶಲ್ಯದ ಪರೀಕ್ಷೆಗೆ ಗುರಿಪಡಿಸಲಿದ್ದಾರೆ.

ಮಿಷನ್‌ನ ಮುಖ್ಯ ಉದ್ದೇಶಗಳು:

1. ಅಂತರೀಕ್ಷದಲ್ಲಿ ಎರಡು ಸಣ್ಣ ಬಾಹ್ಯಾಕಾಶ ನೌಕೆಗಳ ಡಾಕಿಂಗ್ ಮತ್ತು ಅನ್‌ಡಾಕಿಂಗ್‌ಗೆ ಅಗತ್ಯವಿರುವ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸುವುದು.

2. ಡಾಕ್ ಮಾಡಲಾದ ಬಾಹ್ಯಾಕಾಶ ನೌಕೆಯ ನಡುವೆ ವಿದ್ಯುತ್ ಶಕ್ತಿಯ ವರ್ಗಾವಣೆಯ ಪ್ರದರ್ಶನ.

3. ಸಂಯೋಜಿತ ಬಾಹ್ಯಾಕಾಶ ನಿಯಂತ್ರಣ ಮತ್ತು ರೋಬೋಟಿಕ್ಸ್‌ ತಂತ್ರಜ್ಞಾನದ ಶಕ್ತಿಯ ಸಂಪೂರ್ಣ ಬಳಕೆ.

4. ಭವಿಷ್ಯದ ಪೇಲೋಡ್ ಕಾರ್ಯಾಚರಣೆಗಳ ಸಾಮರ್ಥ್ಯವನ್ನು ಹೆಚ್ಚಿಸುವುದು.

ತನ್ನದೇ ಆದ ಬಾಹ್ಯಾಕಾಶ ನಿಲ್ದಾಣವನ್ನು ಸ್ಥಾಪಿಸುವ ಭಾರತದ ಸಾಮರ್ಥ್ಯಕ್ಕೆ, ಈ ಕಾರ್ಯಾಚರಣೆಯು ನಿರ್ಣಾಯಕ ಮುನ್ನುಡಿ ಬರೆಯಲಿದೆ ಎಂದು ಇಸ್ರೋ ವಿಶ್ವಾಸ ವ್ಯಕ್ತಪಡಿಸಿದೆ. ಇದು ಭವಿಷ್ಯದಲ್ಲಿ ಭಾರತದ ಮರುಬಳಕೆ ಮಾಡಬಹುದಾದ ಉಡಾವಣಾ ವಾಹನ (RLV)ದ ಡಾಕಿಂಗ್‌ ಸಾಮರ್ಥ್ಯವನ್ನು ವೃದ್ಧಿಸಲಿದೆ ಎಂದೂ ಇಸ್ರೋ ಮಾಹಿತಿ ನೀಡಿದೆ.

ಮೈಕ್ರೋಗ್ರ್ಯಾವಿಟಿಯೊಂದಿಗೆ ಇಸ್ರೋದ ಪ್ರಯೋಗ:

ಬಾಹ್ಯಾಕಾಶ ಡಾಕಿಂಗ್ ಕೌಶಲ್ಯ ಪ್ರಯೋಗದ ಜೊತೆಗೆ ಪಿಎಸ್‌ಎಲ್‌ವಿ ರಾಕೆಟ್‌ನ ನಾಲ್ಕನೇ ಹಂತದಲ್ಲಿ ಮೈಕ್ರೋಗ್ರ್ಯಾವಿಟಿಯನ್ನು ಪ್ರಯೋಗಕ್ಕೆ ಒಳಪಡಿಸುವುದು ಸ್ಪೆಡೆಕ್ಸ್‌ ಕಾರ್ಯಾಚರಣೆಯ ಮತ್ತೊಂದು ಉದ್ದೇಶವಾಗಿದೆ ಎಂದು ಇಸ್ರೋ ಮಾಹಿತಿ ನೀಡಿದೆ. ಪಿಎಸ್‌ಎಲ್‌ವಿ ಆರ್ಬಿಟಲ್ ಎಕ್ಸ್‌ಪರಿಮೆಂಟಲ್ ಮಾಡ್ಯೂಲ್ 4 (POEM 4) ಹೆಸರಿನ ಈ ಪ್ರಯೋಗದಲ್ಲಿ, ಮೈಕ್ರೋಗ್ರ್ಯಾವಿಟಿಯನ್ನು ಅಧ್ಯಯನ ಮಾಡುವ ಉದ್ದೇಶ ಹೊಂದಲಾಗಿದೆ.

ಒಟ್ಟಿನಲ್ಲಿ ಜಾಗತಿಕ ಬಾಹ್ಯಾಕಾಶ ಸ್ಪರ್ಧೆಯಲ್ಲಿ ತನ್ನ ಅಸ್ತಿತ್ವವನ್ನು ಸಾಬೀತು ಮಾಡುತ್ತಿರುವ ಭಾರತ, ಸ್ಪೆಡೆಕ್ಸ್‌ ಕಾರ್ಯಾಚರಣೆಯ ಮೂಲಕ ಬಾಹ್ಯಾಕಾಶ ತಂತ್ರಜ್ಞಾನದಲ್ಲಿ ಹೊಸ ಯುಗವನ್ನು ಪ್ರವೇಶಿಸಲು ಸಜ್ಜಾಗಿದೆ ಎಂದು ಹೇಳಬಹುದು.