ದಿಲ್ಲಿ ವಿಧಾನ ಸಭಾ ಚುನಾವಣೆ ಹಿನ್ನೆಲೆ : ಉಚಿತ ಕೊಡುಗೆಗಳ ಮಹಾಪೂರ ಹರಿಸಿದ ಆಪ್

ಹೊಸದಿಲ್ಲಿ: ದಿಲ್ಲಿ ವಿಧಾನಸಭೆ ಚುನಾವಣೆಗೆ ಆಮ್‌ ಆದ್ಮಿ ಪಕ್ಷ (ಆಪ್‌) ಉಚಿತ ಕೊಡುಗೆಗಳ ಮಹಾಪೂರವನ್ನೇ ಹರಿಸಿದೆ. ನೋಂದಾಯಿತ ಆಟೋ ಚಾಲಕರಿಗೆ 10 ಲಕ್ಷ ರೂ. ಜೀವ ವಿಮೆ, 5 ಲಕ್ಷ ರೂ. ಅಪಘಾತ ವಿಮೆ ಸೇರಿ ಐದು ಗ್ಯಾರಂಟಿ ಘೋಷಣೆ ಮಾಡಿದೆ.

ಮುಂದಿನ ವರ್ಷದ ಫೆಬ್ರವರಿಯಲ್ಲಿ ನಡೆಯಲಿರುವ ಚುನಾವಣೆಗೆ ಪಕ್ಷದ ಪ್ರಚಾರ ಆರಂಭಿಸಿರುವ ಆಪ್‌ ಸಂಚಾಲಕ, ಮಾಜಿ ಸಿಎಂ ಅರವಿಂದ್‌ ಕೇಜ್ರಿವಾಲ್‌, ದಿಲ್ಲಿ ಆಟೋ ಚಾಲಕರ ಕುಟುಂಬದ ಅನುಕೂಲಕ್ಕಾಗಿ ಮಂಗಳವಾರ ಐದು ಹೊಸ ಭರವಸೆ ನೀಡಿದರು.

ಆಟೋ ಚಾಲಕರ ಮಗಳ ಮದುವೆಗೆ ಒಂದು ಲಕ್ಷ ರೂ. ಆರ್ಥಿಕ ನೆರವು, ಕುಟುಂಬಕ್ಕೆ 10 ಲಕ್ಷ ರೂ. ಜೀವ ವಿಮೆ, ಚಾಲಕರಿಗೆ 5 ಲಕ್ಷ ರೂ.ಗಳ ಅಪಘಾತ ವಿಮೆ, ದೀಪಾವಳಿ ಹಾಗೂ ಹೋಳಿ ಹಬ್ಬದ ವೇಳೆ ಚಾಲಕರ ಮಕ್ಕಳಿಗೆ ಶಾಲಾ ಸಮವಸ್ತ್ರ ಖರೀದಿಸಲು 2,500 ರೂ. ನೆರವು, ಆಟೋ ಚಾಲಕರ ಮಕ್ಕಳಿಗೆ ಉತ್ತಮ ಶಿಕ್ಷಣ ಕಲ್ಪಿಸಲು ಉಚಿತ ಕೋಚಿಂಗ್‌ ನೀಡುವ ಭರವಸೆ ನೀಡಿದೆ.

''ಮೂರನೇ ಅವಧಿಗೆ ಪಕ್ಷವನ್ನು ಅಧಿಕಾರಕ್ಕೆ ತರಲು ವ್ಯವಸ್ಥಿತವಾಗಿ ಪ್ರಚಾರ ಕೈಗೊಳ್ಳಲಾಗಿದೆ. ನಿರ್ದಿಷ್ಟ ವರ್ಗದ ಜನರ ಅನುಕೂಲಕ್ಕೆ ಹೊಸ ಯೋಜನೆ ಘೋಷಿಸಲಾಗಿದೆ. ದಿಲ್ಲಿ ನಾಗರಿಕರ ಜೀವನ ಸುಧಾರಣೆಗೆ ಅಗತ್ಯ ಇರುವ ಕಾರ್ಯಕ್ರಮ ರೂಪಿಸಲಾಗುವುದು,'' ಎಂದು ಮಾಜಿ ಸಿಎಂ ಕೇಜ್ರಿವಾಲ್‌ ಹೇಳಿದರು.

ದಿಲ್ಲಿಸಿ ಎಂ ವಾಸ್ತವ್ಯಕ್ಕೆ ನಿರ್ಮಾಣ ಮಾಡಲಾದ ಶೀಷ್‌ ಮಹಲ್‌ ವಿಷಯವಾಗಿ ಬಿಜೆಪಿ ಹಾಗೂ ಆಮ್‌ ಆದ್ಮಿ ಪಕ್ಷದ ನಡುವೆ ವಾಗ್ವಾದ ನಡೆದಿದೆ. ಬಂಗಲೆ ವಿಡಿಯೋ ಬಿಡುಗಡೆ ಮಾಡಿರುವ ಬಿಜೆಪಿ, ಶೀಷ್‌ ಮಹಲ್‌ ಭ್ರಷ್ಟಾಚಾರದ ವಸ್ತುಸಂಗ್ರಹಾಲಯ ಎಂದು ತೆಗಳಿದೆ. ''ಬಿಜೆಪಿ ಆಡಳಿತ ರಾಜ್ಯಗಳಲ್ಲಿ ಜನರಿಗೆ ಮೂಲಸೌಲಭ್ಯ ಕಲ್ಪಿಸಲು ಸಾಧ್ಯವಾಗಿಲ್ಲ. ಇಂಥ ಬಿಜೆಪಿಯು ಕೇಜ್ರಿವಾಲ್‌ ಬಂಗಲೆ ವಿಷಯವನ್ನು ದೊಡ್ಡದು ಮಾಡುತ್ತಿದೆ,'' ಎಂದು ಆಪ್‌ ಕಿಡಿಕಾರಿದೆ.

ಜನರ ತೆರಿಗೆ ಹಣವನ್ನು ಆಪ್‌ ನಾಯಕರ ವಿಲಾಸಿ ಜೀವನಕ್ಕೆ ವೆಚ್ಚ ಮಾಡಲಾಗಿದೆ. ಭೋಗ ಜೀವನಕ್ಕೆ ಶೀಷ್‌ ಮಹಲ್‌ ನಿರ್ಮಿಸಿಕೊಂಡಿದ್ದಾರೆ. 3.75 ಕೋಟಿ ರೂ. ತೆರಿಗೆ ಹಣವನ್ನು ದುಂದು ವೆಚ್ಚ ಮಾಡಲಾಗಿದೆ. ಕೋಟಿ ಕೋಟಿ ರೂ. ವೆಚ್ಚದಲ್ಲಿ ಕಟ್ಟಿದ ಬಂಗಲೆ ಭ್ರಷ್ಟಾಚಾರದ ವಸ್ತು ಸಂಗ್ರಹಾಲಯವಾಗಿದೆ ಎಂದು ದಿಲ್ಲಿ ಬಿಜೆಪಿ ಅಧ್ಯಕ್ಷ ವೀರೇಂದ್ರ ಸಚ್‌ದೇವ್‌ ಕಿಡಿಕಾರಿದ್ದಾರೆ.

ಬಿಜೆಪಿ ಆಡಳಿತ ರಾಜ್ಯಗಳಲ್ಲಿ ಜನರಿಗೆ ಮೂಲಸೌಲಭ್ಯ ಕಲ್ಪಿಸಲು ಸಾಧ್ಯವಾಗಿಲ್ಲ. ಮಕ್ಕಳಿಗೆ ಮಧ್ಯಾಹ್ನದ ಬಿಸಿಯೂಟ, ಜನರ ಆರೋಗ್ಯ ರಕ್ಷಣೆಗೆ ಸುಸಜ್ಜಿತ ಆಸ್ಪತ್ರೆ ನಿರ್ಮಿಸುವ ಕಡೆ ಗಮನ ಕೊಡದೆ ಕೇಜ್ರಿವಾಲ್‌ ಬಂಗಲೆ ವಿಷಯ ಪ್ರಸ್ತಾಪಿಸುತ್ತಿದೆ. ಆಪ್‌ ವಿರುದ್ಧದ ಅಪಪ್ರಚಾರಕ್ಕೆ ಆಧಾರರಹಿತ ಆರೋಪ ಮಾಡಲಾಗಿದೆ ಎಂದು ದಿಲ್ಲಿ ಮಾಜಿ ಡಿಸಿಎಂ ಮನೀಶ್‌ ಸಿಸೋಡಿಯಾ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.