ಸಚಿನ್‌ ಶತಕಗಳ ‘ಶತಕʼ ಸಾಧನೆಗೆ 13 ವರ್ಷಗಳ ಸಂಭ್ರಮ!

ಹೊಸದಿಲ್ಲಿ: ಕ್ರಿಕೆಟ್‌ ದೇವರು, ಕ್ರಿಕೆಟ್‌ ದಂತಕತೆ ಎನಿಸಿಕೊಂಡಿರುವ ಸಚಿನ್‌ ತೆಂಡೂಲ್ಕರ್‌ ತಮ್ಮ ವೃತ್ತಿ ಬದುಕಿನ 100ನೇ ಶತಕ ಸಿಡಿಸಿ ಇಂದಿಗೆ 13 ವರ್ಷ ವರ್ಷಗಳು ಪೂರ್ಣಗೊಂಡಿವೆ. 2012ರ ಮಾರ್ಚ್‌ 16ರಂದು ತೆಂಡೂಲ್ಕರ್ ಬಾಂಗ್ಲಾದೇಶ ವಿರುದ್ಧ ತಮ್ಮ 100ನೇ ಶತಕ ದಾಖಲಿಸಿ ಕ್ರಿಕೆಟ್‌ ಇತಿಹಾಸಲ್ಲಿ ಹೊಸ ದಾಖಲೆಯನ್ನೇ ಬರೆದಿದ್ದರು.

ಸಚಿಚ್‌ ತೆಂಡೂಲ್ಕರ್‌ ಅವರ 100ನೇ ಶತಕಕ್ಕಾಗಿ ಇಡೀ ಕ್ರಿಕೆಟ್‌ ಪ್ರಪಂಚ ಒಂದು ವರ್ಷಗಳ ಕಾಲ ಕಾತರದಿಂದ ಕಾಯುತ್ತಿತ್ತು. ಅಭಿಮಾನಿಗಳ ಪ್ರಾರ್ಥನೆ 2012ರ ಬಾಂಗ್ಲಾದೇಶ ಪ್ರವಾಸದ ನಾಲ್ಕನೇ ಏಕದಿನ ಪಂದ್ಯದಲ್ಲಿ ಫಲಿಸಿತು. ನೋಡ ನೋಡುತ್ತಿದ್ದಂತೆ ಸಚಿನ್‌ ಬ್ಯಾಟ್‌ನಿಂದ ದಾಖಲೆಯೆ ಶತಕ ಸಿಡಿಯಿತು.

ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ 100 ಶತಕಗಳನ್ನು ಗಳಿಸಿದ ಮೊದಲ ಮತ್ತು ಏಕೈಕ ಆಟಗಾರ ಸಚಿನ್‌ ತೆಂಡೂಲ್ಕರ್.‌ ಟೆಸ್ಟ್‌ 51 ಮತ್ತು ಏಕದಿನ ಪಂದ್ಯಗಳಲ್ಲಿ 49 ಶತಕ ಬಾರಿಸಿದ್ದಾರೆ. ವಿರಾಟ್ ಕೊಹ್ಲಿ 82 ಶತಕ ಬಾರಿಸುವ ಮೂಲಕ ಎರಡನೇ ಸ್ಥಾನದಲ್ಲಿದ್ದಾರೆ.

ಮಿರ್ಪುರ್‌ನಲ್ಲಿ ನಡೆದ ಏಕದಿನ ಪಂದ್ಯದಲ್ಲಿ ಸಚಿನ್ 147 ಎಸೆತಗಳಲ್ಲಿ 114 ರನ್ ಗಳಿಸಿದರು. ಈ ಮೂಲಕ ಭಾರತ 5 ವಿಕೆಟ್‌ಗಳಿಗೆ 289 ರನ್ ಗಳಿಸಿತು. ಸಚಿನ್‌ ತೆಂಡೂಲ್ಕರ್‌ ಪಾಲಿಗೆ ಸ್ಮರಣೀಯವಾಗಿದ್ದ ಈ ಪಂದ್ಯದಲ್ಲಿ ಭಾರತ ಸೋತಿತು. ಸದ್ಯ ಸಚಿನ್‌ರ ಸಾಧನೆಗೆ 13 ವರ್ಷಗಳು ತುಂಬಿರುವ ಹಿನ್ನೆಲೆ ಕ್ರಿಕೆಟಿಗರಿಂದ, ಅಭಿಮಾನಿಗಳಿಂದ ಶುಭಾಶಯಗಳ ಮಹಾಪೂರವೇ ಹರಿದು ಬರುತ್ತಿದೆ.

99ನೇ ಶತಕ ಸಿಡಿಸಿ 100ನೇ ಶತಕದ ಹೊಸ್ತಿಲು ದಾಟಲು ಸಚಿನ್ ತೆಂಡೂಲ್ಕರ್ ಭರ್ತಿ ಒಂದು ವರ್ಷ ನಾಲ್ಕು ದಿನಗಳಷ್ಟು ಕಾಲ ಕಾಯಬೇಕಾಗಿ ಬಂತು. ಢಾಕಾದಲ್ಲಿ ನಡೆದ ಪಂದ್ಯದಲ್ಲಿ 12 ಬೌಂಡರಿ ಮತ್ತು ಸಿಕ್ಸರ್‌ಗಳ ನೆರವಿನಿಂದ 114 ರನ್ ಗಳಿಸಿದರು. ಈ ಕ್ಷಣ ಇಂದಿಗೂ ಭಾರತ ಸೇರಿದಂತೆ ವಿಶ್ವ ಕ್ರಿಕೆಟ್ ಪಾಲಿಗೆ ಅವಿಸ್ಮರಣೀಯ ಎನಿಸಿದೆ. ಇದು ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಸಚಿನ್ ತೆಂಡೂಲ್ಕರ್ ಸಿಡಿಸಿದ ಕೊನೆಯ ಶತಕವಾಗಿದೆ.

2011ರಲ್ಲಿ ಏಕದಿನ ವಿಶ್ವಕಪ್‌ನದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ 99ನೇ ಶತಕ ಸಿಡಿಸಿದ್ದ ಸಚಿನ್, ಆ ಬಳಿಕ ಶತಕದ ಬರ ಎದುರಿಸಿದ್ದರು. ಇದರಿಂದಾಗಿ 100ನೇ ಶತಕ ಗಳಿಸಲು ಸಾಧ್ಯವೇ ಎಂಬ ಪ್ರಶ್ನೆ ಎಲ್ಲರನ್ನೂ ಕಾಡುತ್ತಿತ್ತು. ಹೀಗಾಗಿ ಪ್ರತಿ ಬಾರಿಯೂ ತೆಂಡೂಲ್ಕರ್‌ ಮೈದಾನಕ್ಕಿಳಿದಾಗ ಫ್ಯಾನ್ಸ್‌ ಪ್ರಾರ್ಥನೆ ಸಲ್ಲಿಸುತ್ತಿದ್ದರು. ಈ ಮಧ್ಯೆ ಪಾಕಿಸ್ತಾನ ವಿರುದ್ದ 85, ವೆಸ್ಟ್ ಇಂಡೀಸ್ ವಿರುದ್ಧ 94 ಮತ್ತು ಆಸ್ಟ್ರೇಲಿಯಾ ವಿರುದ್ಧ 80 ರನ್ ಗಳಿಸಿ ಔಟ್ ಆಗಿದ್ದರು. ಕೊನೆಗೆ ಬಾಂಗ್ಲಾದೇಶ ವಿರುದ್ಧ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ 100ನೇ ಶತಕದ ಸಾಧನೆ ಮಾಡಿದರು.