ಕಡಲಾಮೆಯ ಬಾಣಂತನಕ್ಕೆ ಸಜ್ಜಾದ ಅರಣ್ಯ ಇಲಾಖೆ

ಗೋಕರ್ಣ: ಕಡಲಾಮೆಗಳು ಮೊಟ್ಟೆಇಡುವ ಹಂಗಾಮ ಪ್ರಾರಂಭವಾಗಿದೆ. ಹೀಗಾಗಿ ಕಡಲಜೀವಿಯ ಬಾಣಂತನಕ್ಕೆ ಅರಣ್ಯ ಇಲಾಖೆ ಸಜ್ಜಾಗಿದ್ದು, ಮೊಟ್ಟೆ ಸಂರಕ್ಷಣೆಯ ಕಾರ್ಯ ಪ್ರಾರಂಭಿಸಿದ್ದಾರೆ. ಗುರುವಾರ ರಾತ್ರಿ ದುಬ್ಬನಸಸಿಯ ಕಡಲತೀರದಲ್ಲಿ ಅರಣ್ಯ ಇಲಾಖೆಯವರು ಗಸ್ತು ತಿರುಗಾಡುತ್ತಿರುವಾಗ ಆಮೆ ಮೊಟ್ಟೆ ಇಡುತ್ತಿರುವುದನ್ನ ಗಮನಿಸಿದ್ದಾರೆ. ಕೂಡಲೇ ಉಪವಲಯ ಅರಣ್ಯಾಧಿಕಾರಿ ಹಾಗೂ ಸಿಬ್ಬಂದಿ ಒಟ್ಟು 130 ಮೊಟ್ಟೆಗಳನ್ನು ಸುರಕ್ಷಿತವಾಗಿ ತೆಗೆದು ಸಂರಕ್ಷಣಾ ಕೇಂದ್ರದಲ್ಲಿ ಇಟ್ಟಿದ್ದಾರೆ.

ಕಡಲ ತೀರದಲ್ಲಿ ಮೊಟ್ಟೆ ಇಡುವ ಕಡಲಾಮೆಗಳು

ಡಿಸೆಂಬರ್ ತಿಂಗಳಿಂದ ಮೇ ತಿಂಗಳವರೆಗೆ ಅಂದರೆ ಆರು ತಿಂಗಳ ಕಾಲ ಕಡಲಾಮೆಯ ಸಂತಾನೋತ್ಪತ್ತಿ ಅವಧಿಯಾಗಿದೆ. ಇಲ್ಲಿನ ಮುಖ್ಯ ಕಡಲತೀರದಿಂದ ರುದ್ರಪಾದ, ಗಂಗೆಕೊಳ್ಳ, ದುಬ್ಬನಸಸಿ, ಗಂಗಾವಳಿಯವರೆಗಿನ ಐದು ಕಿ.ಮೀ. ವಿಸ್ತಾರದ ಕಡಲತಟದಲ್ಲಿ ಮೊಟ್ಟೆ ಇಡುತ್ತವೆ. ಸಾಮಾನ್ಯವಾಗಿ ರಾತ್ರಿ ವೇಳೆ ಬರುವ ಆಮೆಗಳು ಮರಳಿನಲ್ಲಿ ಮೊಟ್ಟೆ ಇಟ್ಟು ಮುಚ್ಚಿ ತೆರಳುತ್ತದೆ. ಮರಳಿನ ಕಾವಿನಿಂದ ಮರಿ ಹೊರಬರುವ ಬಹು ವಿಶಿಷ್ಟ ವಂಶವೃದ್ದಿಯ ಈ ನೈಸರ್ಗಿಕ ಪ್ರಕ್ರಿಯೆಗೆ ಯಾರಿಂದಲೂ ತೊಂದರೆಯಾಗಬಾರದೆಂದು ಅರಣ್ಯ ಇಲಾಖೆ ಮುನ್ನೆಚ್ಚರಿಕೆ ವಹಿಸಿದೆ.

45 ದಿನಗಳ ಬಳಿಕ ಸಮುದ್ರಕ್ಕೆ ಬಿಡುವ ಕಾರ್ಯ

ನಾಯಿ ಮತ್ತಿತರ ಪ್ರಾಣಿ ಹಾಗೂ ಮನುಷ್ಯರು ತೊಂದರೆ ನೀಡಬಾರದೆಂದು ಈ ಕ್ರಮ ವಹಿಸಲು ಅರಣ್ಯ ಇಲಾಖೆ ಮುಂದಾಗಿದೆ. ಹೀಗಾಗಿ ಮೊಟ್ಟೆ ಗೂಡನ್ನು ಗುರುತಿಸಿ, ಮೊಟ್ಟೆ ತೆಗೆದು ಗಂಗೆಕೊಳ್ಳದಲ್ಲಿರುವ ಆಮೆ ಮೊಟ್ಟೆ ಸಂರಕ್ಷಣಾ ಕೇಂದ್ರದಲ್ಲಿ ಹುಗಿದಿಟ್ಟು, ಮರಿ ಹೊರ ಬರಲು ಬೇಕಾಗುವ 45 ದಿನಗಳ ಅವಧಿಯವರೆಗೆ ನಿಗಾವಹಿಸಿ, ಮರಿಯನ್ನು ಸಮುದ್ರಕ್ಕೆ ಬಿಡುತ್ತಾರೆ.

ಕಳೆದ ವರ್ಷ ಆಮೆಗಳು ಅತಿ ಹೆಚ್ಚು ಮೊಟ್ಟೆ ಇಟ್ಟು ದಾಖಲೆ ನಿರ್ಮಿಸಿದ್ದವು. ಒಟ್ಟು 104 ಗೂಡು ದೊರೆತಿದ್ದವು, ಒಟ್ಟು 8 ಸಾವಿರ ಮೊಟ್ಟೆಯನ್ನು ಸಂರಕ್ಷಿಸಿ, 7200 ಮರಿಯನ್ನ ಕಳೆದ ಅವಧಿಯಲ್ಲಿ ಕಡಲ ಒಡಲಿಗೆ ಬಿಡಲಾಗಿತ್ತು. ಈ ಮರಿ ಬಿಡುವ ಸಂದರ್ಭದಲ್ಲಿ ಶಾಲಾ ವಿದ್ಯಾರ್ಥಿಗಳು, ಗಣ್ಯ ವ್ಯಕ್ತಿಗಳು, ಸಾರ್ವಜನಿಕರು ಸೇರಿರುತ್ತಾರೆ. ಇವರೆಲ್ಲರ ಸಮ್ಮುಖದಲ್ಲಿ ಹಬ್ಬದ ಸಂಭ್ರಮದಂತೆ ಈ ಜೀವಿಗಳನ್ನು ಬೀಳ್ಕೊಡುವುದು ಬಹು ವಿಶೇಷವಾಗಿರುತ್ತದೆ. ಈ ವರ್ಷ ಈವರೆಗೆ ಮೂರು ಗೂಡು ದೊರೆತಿದ್ದು, 310 ಮೊಟ್ಟೆಗಳನ್ನು ಸಂರಕ್ಷಿಸಲಾಗಿದೆ.