ಮಾಜಿ ಬಿಗ್ ಬಾಸ್ ಸ್ಪರ್ಧಿಗಳಿಗೆ ಕಾನೂನು ಸಂಕಷ್ಟ !

ಬಿಗ್ ಬಾಸ್ ಸೀಸನ್ 10ರ ಸ್ಪರ್ಧಿ ವಿನಯ್‌ ಗೌಡ ಮತ್ತು 11ರ ಸ್ಪರ್ಧಿ ಯೂಟ್ಯೂಬರ್‌ ರಜತ್‌ಗೆ ಕಾನೂನು ಸಂಕಷ್ಟ ಎದುರಾಗಿದೆ. ದರ್ಶನ್‌ ಮೆಜೆಸ್ಟಿಕ್‌ ಸಿನಿಮಾದಂತೆ ಲಾಂಗ್‌ ಹಿಡಿದು ಸ್ಲೋ ವಾಕ್‌ ಮಾಡಿರುವ ರೀಲ್ಸ್‌ ಹಂಚಿಕೊಂಡಿದ್ದ ಹಿನ್ನೆಲೆ, ಕಾನೂನು ಬಾಹಿರ ಮಾರಕಾಸ್ತ್ರ ಹಿಡಿದು ಶಾಂತಿಭಂಗ ಮಾಡಲಾಗಿದೆ ಎಂದು ಬೆಂಗಳೂರಿನ ಬಸವೇಶ್ವರ ನಗರ ಪೊಲೀಸ್‌ ಠಾಣೆಯಲ್ಲಿ ಎಫ್‌ಐಆ‌ರ್ ದಾಖಲಾಗಿದೆ.

ಬಿಗ್ ಬಾಸ್ ಸೀಸನ್ 10ರ ಸ್ಪರ್ಧಿ ವಿನಯ್‌ ಗೌಡ ಮ ತ್ತು 11ರ ಸ್ಪರ್ಧಿ ಯೂಟ್ಯೂಬರ್‌ ರಜತ್‌ ಇಬ್ಬರು ಚಾಲೆಂಜಿಂಗ್‌ ಸ್ಟಾರ್‌ ದರ್ಶನ್‌ನ ಅಭಿಮಾನಿಗಳು. ಬಿಗ್‌ಬಾಸ್‌ ಮನೆಯಲ್ಲಿ ಇರುವಾಗಲು ದರ್ಶನ್‌ ಪರ ಮಾತನಾಡಿದ್ದರು. ಖಾಸಗಿ ಚಾನೆಲ್‌ನಲ್ಲಿ ಕಿರುತರೆ ರಿಯಾಲಿಟಿ ಶೋಗಳಲ್ಲಿ ರಜತ್‌ ಕಿಶನ್‌ ಮತ್ತು ವಿನಯ್‌ ಸದ್ಯ ಕಂಟೆಸ್ಟೆಂಟ್‌ಗಳಾಗಿ ಭಾಗವಹಿಸುತ್ತಿದ್ದಾರೆ. ವಿನಯ್‌ ಹಲವಾರು ಧಾರವಾಹಿಗಳಲ್ಲಿ ಲೀಡಿಂಗ್‌ ರೋಲ್‌ಗಳಲ್ಲಿ ಮಿಂಚಿದ್ದರು. ಬಿಗ್‌ಬಾಸ್‌ನಲ್ಲಿ ಹೆಣ್ಣುಮಕ್ಕಳ ಬಳೆ ವಿಚಾರವಾಗಿ ಸಾಕಷ್ಟು ಟ್ರೋಲ್‌ ಸಹ ಆಗಿದ್ದರು.

ಇತ್ತೀಚೆಗೆ ರಜತ್‌ ಮತ್ತು ನಟ ವಿನಯ್‌ ಇಬ್ಬರು ಸೇರಿ ಲಾಂಗ್‌ ಹಿಡಿದು ರೀಲ್ಸ್‌ ಮಾಡಿದ್ದ ವಿಡಿಯೋ ಸೋಶಿಯಲ್‌ ಮೀಡಿಯಾದಲ್ಲಿ ಹಂಚಿಕೊಂಡಿದ್ದರು. ಇದು ಸಾಕಷ್ಟು ಸದ್ದು ಮಾಡಿತ್ತು. ಆ ರೀಲ್ಸ್‌ನಲ್ಲಿ ಚಾಲೆಂಜಿಂಗ್‌ ಸ್ಟಾರ್‌ ಸಿನಿಮಾದ ಹೆಸರಿರುವ ಬಟ್ಟೆ ತೊಟ್ಟು, ಸಾರ್ವಜನಿಕ ಸ್ಥಳದಲ್ಲಿ ಲಾಂಗ್ ಹಿಡಿದು, ಕಣ್ಣಿಗೆ ಕೂಲಿಂಗ್ ಗ್ಲಾಸ್ ಹಾಕಿಕೊಂಡು ದರ್ಶನ್ 'ಮೆಜೆಸ್ಟಿಕ್' ಸಿನಿಮಾದ ಸ್ಟೈಲ್‌ನಲ್ಲಿ ಸ್ಲೋ ಮೋಷನ್‌ನಲ್ಲಿ ನಡೆದಂತೆ ಇವರು ವಾಕ್‌ ಮಾಡಿ ರೀಲ್ಸ್‌ ಅಪ್ಲೋಡ್‌ ಮಾಡಿದ್ದರು. ಇದೇ ವಿಡಿಯೋ ಆಧರಿಸಿ ಸದ್ಯ ಇಬ್ಬರ ಮೇಲೂ ಎಫ್‌ಐಆರ್‌ ದಾಖಲಾಗಿದೆ

ದೂರು ಕೊಟ್ಟಿದ್ದು ಯಾರು, FIRನಲ್ಲಿ ಏನಿದೆ?

ಬಸವೇಶ್ವರನಗರ ಠಾಣಾ ಪಿಎಸ್ಐ ಭಾನು ಪ್ರಕಾಶ್ ದೂರು ನೀಡಿದ್ದಾರೆ. ಇವರ ದೂರಿನ ಅನ್ವಯ ಆರ್ಮ್ ಆ್ಯಕ್ಟ್ ಅಡಿ‌ ಎಫ್‌ಐಆರ್‌ ದಾಖಲಾಗಿದೆ. ನಿಷೇದಿತ ಮಾರಕಾಸ್ತ್ರ ಹಿಡಿದುಕೊಂಡು ಸಾರ್ವಜನಿಕ ಸ್ಥಳದಲಿ, ಕಾನೂನು ಬಾಹಿರವಾಗಿ ರೀಲ್ಸ್‌ ಮಾಡಲಾಗಿದೆ. ಲಾಂಗ್ ಹಿಡಿದುಕೊಂಡು ಇಬ್ಬರು ಜೊತೆಗೆ ನಡೆದುಕೊಂಡ ರೀಲ್ಸ್ ವಿಡಿಯೋ ಬುಜ್ಜಿ ಹೆಸರಿನ ಇನ್‌ಸ್ಟಾಗ್ರಾಂ ಖಾತೆಯಲ್ಲಿ ಅಪ್ಲೋಡ್ ಮಾಡಿದ್ದಾರೆ. ಇದು ಸಾರ್ವಜನಿಕರ ಶಾಂತಿ ನೆಮ್ಮದಿಗೆ ಭಂಗವಾಗುವಂತಹ ಕೆಲಸವಾಗಿದೆ. 18 ಸೆಕೆಂಡ್ ಇರುವ ರೀಲ್ಸ್‌ ಲಿಂಕ್‌ನೊಂದಿಗೆ ಪಿಎಸ್‌ಐ ದೂರು ನೀಡಿದ್ದಾರೆ. ರಜತ್ ಹಾಗೂ ವಿನಯ್ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಬೇಕೆಂದು ಬಸವೇಶ್ವರನಗರ ಠಾಣೆಯ ಸೋಷಿಯಲ್ ಮೀಡಿಯಾ ಮಾನಿಟಿರಿಂಗ್ ಉಸ್ತುವಾರಿ ಆಗಿರುವ ಪಿಎಸ್ಐ ಭಾನು ಪ್ರಕಾಶ್ ಎಸ್‌ ಸ್ವಯಂ ದೂರು ದಾಖಲಿಸಿದ್ದಾರೆ. ಇನ್ನೂ ಇಬ್ಬರು ನಟರಿಗೂ ವಿಚಾರಣೆಗೆ ಹಾಜರಾಗುವಂತೆ ನೋಟಿಸ್‌ ನೀಡೋ ಸಾಧ್ಯತೆ ಇದೆ.

ವಿನಯ್‌ ರಜತ್‌ ಹೀಗೆ ರೀಲ್ಸ್‌ ಮಾಡಿದ್ಯಾಕೆ?

ಬಾಯ್ಸ್ ವರ್ಸಸ್ ಗರ್ಲ್ಸ್' ಶೋನಲ್ಲಿ ಸ್ಯಾಂಡಲ್‌ವುಡ್ ಸೆಲೆಬ್ರೆಟಿಗಳ ಗ್ರಾಂಡ್ ರೌಂಡ್ ನಡೆದಿತ್ತು. ಅದಕ್ಕಾಗಿ ಎಲ್ಲರೂ ಒಬ್ಬೊಬ್ಬ ನಟ-ನಟಿಯರಂತೆ ಕಾಣಿಸಿಕೊಳ್ಳಬೇಕಿತ್ತು. ಹಾಗಾಗಿ, ರಜತ್ ಕೂಡ ದರ್ಶನ್ ಅವರ ಕರಿಯ ಸಿನಿಮಾದ ಗೆಟಪ್‌ನಲ್ಲಿ ಕಾಣಿಸಿಕೊಂಡಿದ್ದರು. ಅದೇ ಗೆಟಪ್‌ನಲ್ಲಿ ರೀಲ್ಸ್ ಮಾಡಿಕೊಂಡು, ಅದನ್ನು ಸೋಶಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದರು. ಈ ರೀಲ್ಸ್‌ ಸದ್ಯ ಇಬ್ಬರಿಗೂ ಸಂಕಷ್ಟಕ್ಕೆ ದೂಡಿದೆ.

ಪೊಲೀಸರ ನಡೆ ರೀಲ್ಸ್‌ ಮಾಡೋರಿಗೆ ಪರೋಕ್ಷ ಎಚ್ಚರಿಕೆ

ರೀಲ್ಸ್‌ ಮಾಡಿ ವ್ಯೂವ್ಸ್‌ಗಳಿಸಲು ಇತ್ತೀಚೆಗೆ ಏನೇನೋ ಯಡವಟ್ಟು ಮಾಡಿಕೊಳ್ಳುವುದು ನೋಡುತ್ತಲೆ ಇರುತ್ತೇವೆ. ವಿಕ್ಕಿಪೀಡಿಯಾ ಎಂಬ ತಂಡದ ಮೇಲೂ ಇಂತದ್ದೊಂದು ಅವಾಂತರ ಘಟನೆ ನಡೆದಿತ್ತು. ಡ್ರಗ್ಸ್‌ ಬಗ್ಗೆ ತಪ್ಪು ಸಂದೇಶ ನೀಡುತ್ತಿದ್ದಾರೆ ಎಂದು ಪೊಲೀಸರು ಅವರನ್ನು ಠಾಣೆಗೆ ಕರೆಸಿ, ರೀಲ್ಸ್‌ ಡಿಲೀಟ್‌ ಮಾಡಿಸಿದ್ದರು. ಸದ್ಯ ರಜತ್‌, ವಿನಯ್‌ ಅದೇ ಸಾಲಿನಲ್ಲಿ ಇದ್ದಾರೆ.

ಇಂತಹ ಪ್ರಕರಣಗಳು ಮುಂದಿನ ದಿನಗಳಲ್ಲಿ ಇದನ್ನೇ ಅನುಸರಿಸಿ ಪೋಸ್ಟ್‌ ಹಂಚಿಕೊಳ್ಳುವವರಿಗೆ ಇದೊಂದು ಪಾಠ. ಲಾಂಗ್‌ ಮಚ್ಚು ಹಿಡಿದು ಶೋಕಿ ಮಾಡಿ ಜನರಲ್ಲಿ ಭಯ ಹುಟ್ಟಿಸುವ ಮುನ್ನ ಮುಂದಾಗುವ ಅವಘಡಗಳ ಬಗ್ಗೆ ಯೋಚಿಸುವಂತೆ ಈ ಘಟನೆ ಬೇರೊಬ್ಬರಿಗೂ ಎಚ್ಚರಿಕೆ ನೀಡಿದಂತಾಗಿದೆ.